मुलुक डेस्क, काठमाडौं । २०८१ भाद्र २०, बिहीवार
वीरगञ्ज । मधेश प्रदेशका मुख्यमन्त्री सतिश सिंहले संघीय सरकारले प्रदेशलाई पूर्ण अधिकार नदिँदा प्रदेश सरकारलाई काम गर्न कठिन भएको बताएका छन्। उनले प्रदेशलाई सशक्त र समृद्ध बनाउनका लागि अधिकार अभावको समस्या महत्वपूर्ण चुनौती बनेको भन्दै यस विषयमा संघीय सरकारसँग लामो समयदेखि संवाद भइरहे पनि ठोस जवाफ र अधिकार नआएकाले काम गर्न असहज भएको बताए।
वीरगञ्जमा आयोजित न्यूज २४ टेलिभिजनको प्रादेशिक कार्यालयको उद्घाटन समारोहलाई सम्बोधन गर्दै मुख्यमन्त्री सिंहले मधेश प्रदेशको विकास र समृद्धिमा मिडियाले प्रभावकारी भूमिका खेल्नुपर्ने कुरामा जोड दिए। उनले मधेश प्रदेशका जनताको आवाजलाई मूलधारको मिडियामा सशक्त रूपमा उठान गरी प्रदेशको हक, अधिकार र विकासका मुद्दाहरूलाई प्रभावकारी ढंगले प्रस्तुत गर्न मिडियाको भूमिका महत्वपूर्ण रहेको बताए।
मुख्यमन्त्री सिंहले मधेश प्रदेश सरकारलाई मिडियामैत्री सरकारको रूपमा चित्रण गर्दै, प्रदेशले मिडिया क्षेत्रको सशक्तीकरणका लागि विभिन्न महत्वपूर्ण कदम चालेको जानकारी दिए। उनले मधेश प्रदेशमा पहिलो पटक प्रदेशस्तरीय मिडिया काउन्सिल र आमसञ्चार प्राधिकरण गठन भएको स्मरण गराए, जसले प्रदेशको मिडियालाई बलियो बनाउने काम गरेको छ।
यसैगरी आगामी आर्थिक वर्षदेखि प्रदेशमा दर्ता भएका पत्रकारहरूको लागि एक लाख रुपैयाँको स्वास्थ्य बिमा र सात लाख रुपैयाँको दुर्घटना बिमा गरिने योजना रहेको उनले बताए। यो कदम प्रदेश सरकारको मिडिया क्षेत्रप्रति गहिरो प्रतिबद्धताको उदाहरण भएको भन्दै मिडियाकर्मीहरूलाई उच्च शिक्षा अध्ययनका लागि छात्रवृत्ति उपलब्ध गराउने योजनाबारे पनि जानकारी दिए।
संघीय सरकारले मधेश प्रदेशलाई आवश्यक अधिकार नदिँदा काममा समस्या देखिएको उनले बताउँदै भने, “सात वर्ष बितिसक्दा पनि संघीय सरकारले प्रदेशलाई पूर्ण अधिकार दिएको छैन, तर अधिकारको अभावमा निराश नभई उपलब्ध अधिकारको सही सदुपयोग गर्दै हामी प्रदेशलाई समृद्ध बनाउन लागिरहेका छौं।”
मुख्यमन्त्री सिंहले वीरगञ्जलाई देशकै प्रमुख आर्थिक तथा औद्योगिक नगरी भएको बताउँदै यसबाट प्रदेशले लाभ लिने गरी काम गर्नुपर्नेमा जोड दिए। प्रदेशको समृद्धिका लागि उद्योगी र व्यवसायीहरूसँग सहकार्य गरेर आर्थिक क्रान्ति सुरु गरिने र यसबाट मधेशको समृद्धि सुनिश्चित गरिने योजना पनि उनले सुनाए।