वर्षः ०२ | अङ्कः १६ | फाल्गुण–चैत्र २०७६
पूर्व प्रधानमन्त्री तथा सत्तारुढ दल नेकपाका अध्यक्ष पुष्पकमल दाहाल प्रचण्डलाई लक्षित गरी जुत्ता प्रहार गरेका छन् रतन बहादुर तिरुवाले । पूर्व उपप्रधानमन्त्री भरतमोहन अधिकारीको प्रथम वार्षिक पुण्यतिथिको अवसरमा राष्ट्रिय सभा गृहमा आयोजित कार्यक्रममा दाहालले भाषण गरिरहेको बेला तिरुवाले जुत्ता प्रहार गरेका हुन् । तिरुवा सशस्त्र द्वन्द्वमा ज्यान गुमाएका माओवादी कार्यकर्ता मनबहादुर तिरुवाका सन्तान हुन् । २० वर्ष अघि जुम्लाको सिँजा निवासी मनबहादुर सशस्त्र द्वन्द्वमा मारिएका थिए ।
मनबहादुरको मृत्युबखत रतन ४ वर्षका थिए । वर्ग संघर्षको कुरा गर्ने प्रचण्डको काम एकातिर कुरा अर्कैतिर भएपछि सहन नसकेर जुत्ता फुकालेर रतनले प्रहार गरेका थिए । उनी हाल काठमाडौँमा लोकसेवा आयोगको परीक्षाको तयारी गरिरहेका छन् । जनतामा राजनीतिक नेतृत्वको आक्रोस एवं दुई जिब्रे बोलीको उपज हो यस्ताखाले गतिविधि । पूर्वप्रधानमन्त्री प्रचण्डमाथि यस्ता खालको दोस्रो घटना हो । यसअघि पनि २०६९ सालमा भृकुटीमण्डपमा माओवादीको चीयापान कार्यक्रममै उनैका कार्यकर्ता पदम कुँवरले मञ्चमा पुगेर प्रचण्डलाई द्रहो थप्पड हिर्काएका थिए ।